आवूर येथील श्री पशुपतीश्वरर मंदिर

हे मंदिर थिरुनल्लूरमधल्या श्री पंचवर्णेश्वरर ह्या मंदिराशी निगडित सप्त स्थान मंदिरातील एक मंदिर आहे. कुंभकोणम पासून १० किलोमीटर्स कुंभकोणम-वलगैमन-गोविंदकुडी मार्गावर थिरुवारुर जिल्ह्यातील वलगैमन तालुक्यामध्ये आवूर ह्या गावामध्ये वसलेलं आहे. नायनमारांनी स्तुती केलेल्या २७६ पाडळ पेथ्र स्थळांपैकी हे मंदिर कावेरी नदीच्या दक्षिण काठावर आहे. शैव संत संबंधर ह्यांनी ह्या मंदिराची स्तुती केली आहे. ह्या मंदिराचे नाव श्री पशुपतीश्वरर मंदिर असे आहे. ह्या स्थळाचे वर्तमान नाव आवूर (गोविंदकुडी) असे आहे. ह्या मंदिराचे वर्तमान बांधकाम २००० वर्षे जुनं आहे. इथल्या शिलालेखांमध्ये चोळा राजांनी मंदिरासाठी केलेल्या कामाचे तसेच त्यांनी दिलेल्या देणग्यांचे उल्लेख आहेत. कोचेंगट चोळा राजाने बांधलेल्या माड-कोविल शैलीच्या मंदिरांपैकी हे एक मंदिर आहे. तसेच हे पंचभैरव स्थळांपैकीपण एक आहे.

मूलवर: श्री पशुपतीश्वरर, श्री अश्वथनाथर, श्री आवूरवूडीयार, श्री पशुपतीनाथर
देवी: श्री मंगलांबिका, श्री पंकजवल्ली
पवित्र तीर्थ: ब्रह्म तीर्थ, कामधेनू तीर्थ, चंद्र तीर्थ, अग्नी तीर्थ
क्षेत्र वृक्ष: पीपल (तामिळ मध्ये अरुसु)
पुराणिक नाव: अश्वथवनम, मणिकुडम

क्षेत्र पुराण: 

१. ह्या आधीच्या लेखामध्ये म्हणजेच थिरुनल्लूर येथील श्री पंचवर्णेश्वरर मंदिराबद्दलच्या लेखामध्ये उल्लेखिलेल्या प्रमाणे आदिशेष आणि वायुदेव ह्यांच्या युद्धामध्ये मेरू पर्वताची दोन शिखरे तुटली आणि त्यातील एक शिखर थिरुनल्लूर येथे पडलं तर दुसरं शिखर ह्या ठिकाणी पडलं. 

२. एकदा वसिष्ठ ऋषींनी त्यांच्या कामधेनू गायीला ती यज्ञासाठी दूध देत नव्हती म्हणून तिला शाप दिला. ह्या शापापासून मुक्ती मिळविण्यासाठी कामधेनू श्री ब्रह्मदेवांकडे गेली. त्यांनी तिला ह्या ठिकाणी येऊन भगवान शिवांची उपासना करण्याचा सल्ला दिला. कामधेनूने श्री ब्रह्मदेवाच्या सल्ल्यानुसार इथे येऊन भगवान शिवांची उपासना केली आणि तिला शापापासून मुक्ती मिळाली. तामिळ मध्ये आ म्हणजे गाय आणि उर म्हणजे गाव. म्हणून ह्या गावाचे नाव आवूर असे आहे. तसेच गो म्हणजे गाय, विंद म्हणजे येणे आणि कुडी म्हणजे गाव. इथे कामधेनू आली म्हणून ह्या गावाला गोविंदकुडी असे नाव पडले. ह्या ठिकाणी कामधेनूने भगवान शिवांची उपासना केली म्हणून इथे भगवा शिवांचे नाव श्री पशुपतीश्वरर असे आहे.

३. सिद्ध थिरुमल हे श्रेष्ठ शैव संत होते. एकदा त्यांनी एक गायींचा चा कळप आपल्या मालकाच्या मृत देहाच्या बाजूला उभा बघितला आणि त्या गायी शोक करत होत्या. ह्या सिद्धांनी आपली सिद्धीचा उपयोग करून त्या कळपाच्या मालकाच्या मृतदेहामध्ये प्रवेश केला. जिवंत झालेल्या कळपाच्या मालकाने त्या गायींची देखभाल केली आणि आणि भगवान शिवांच्या स्तुत्यर्थ ३००० स्तोत्रे गायली. हे पुराण पुढील तीन मंदिरांशी निगडित आहे - १) त्रिभुवनम येथील श्री गोमुक्तीश्वरर, २) पट्टिश्वरम येथील धेनुपूरीश्वरर आणि ३) पुडिकोट्टै येथील थिरुगोकर्णम

४. एकदा श्री पार्वती देवी ह्या ठिकाणी तपश्चर्या करण्यासाठी आल्या. त्याचबरोबर देवलोकांमधून देव पण ह्या ठिकाणी वृक्ष आणि वनस्पतींच्या रूपात आले आणि त्यांनी श्री पार्वती देवींची उपासना केली. श्री पार्वती देवींच्या तपश्चर्येवर प्रसन्न होऊन भगवान शिव त्यांच्या समोर जटाधारी रूपामध्ये प्रकट झाले. म्हणून इथे भगवान शिवांना श्री कपर्दिश्वरर असे नाव पडले.

५. कामधेनू च्या पिल्लाला पट्टी असं म्हणतात. तिला ह्या जागेची माहिती जेव्हा कळली तेव्हा तिने इकडे येऊन शिवलिंगावर तिच्या दुधाने अभिषेक केला. भगवान शिव तिच्या भक्तीने प्रस्सन झाले आणि ते इथे राहिले.

६. असा समज आहे कि इथे धर्मध्वज राजा ज्याला कुष्ठरोग झाला होता, त्याने इथे तीर्थामध्ये स्नान करून आणि शिव लिंगावर दुधाचा अभिषेक करून ह्या रोगातून मुक्ती मिळविली. 

७. एकदा राजा दशरथ इथे भगवान शिवांची उपासना करण्यासाठी आले. त्यांनी श्री पंकजवल्ली देवींची प्राणप्रतिष्ठा केली आणि भगवान शिव आणि श्री पंकजवल्ली देवी ह्या दोघांची उपासना केली. दैववाणीने त्यांना पंचभैरवांच्या मूर्ती जिथे पुरल्या होत्या त्या जागेबद्दल दर्शित केलं. राजा दशरथांनी ह्या मूर्तींची पण श्री पंकजवल्ली देवी ह्यांच्या मूर्तीसमोर प्राणप्रतिष्ठा केली. त्याचबरोबर त्यांनी इथे श्री मुरुगन ह्यांची पुत्रप्राप्तीसाठी उपासना केली. असा समज आहे कि ह्या उपासनेमुळेच राजा दशरथांना प्रभू श्रीराम हे पुत्र प्राप्त झाले. इथे एक शिल्प आहे ज्यामध्ये राजा दशरथ भगवान शिवांची उपासना करत आहे असे दाखवले आहे. आणि त्यांनी श्री मुरुगन ह्यांची उपासना केली हे दर्शविण्यासाठी श्री मुरुगन ह्यांच्या हातामध्ये धनुष्य बाण आहेत. 

ह्या ठिकाणी ज्यांनी उपासना केली त्यांची नावे:

श्री ब्रह्म, सप्त ऋषी, शिवगण, देव, गंधर्व, श्री इंद्र, श्री सूर्य, नवग्रह, श्री विष्णू, राजा दशरथ.   

वैशिष्ट्ये:

१. ह्या स्थळाला दक्षिण कैलास असं म्हणतात.

२. हे पंचभैरव स्थळ पण आहे.

३. ह्या मंदिरामध्ये श्री अंबिकादेवींची दोन देवालये आहेत. एक आहे श्री मंगलांबिका, ज्यांची मूर्ती मंदिराच्या तलावामध्ये मिळाली होती. त्याहूनही एक जुनी मूर्ती आहे. ती आहे श्री पंकजवल्ली ह्यांची. ह्या मूर्तीचा उल्लेख श्री संबंधर ह्यांच्या स्तोत्रांमधे आढळतो. जरी हे शिव मंदिर असलं तरी ते श्री मंगलांबिका मंदिर म्हणून प्रसिद्ध आहे.

४. हे संगम काळातल्या आवूरकिळर, आवूरमुलनकिळर आणि पेरूंथळै सथनार ह्या विद्वान कवींचे जन्मस्थान आहे.

५. इथल्या ध्वजस्तंभावर कामधेनूचे शिल्प आहे. ह्या शिल्पामध्ये ती शिवलिंगावर दुधाचा अभिषेक करत आहे असे चित्रित केले आहे.

६. मुख्य मंडपामध्ये एक उठावदार चित्र आहे ज्यामध्ये राजा दशरथ भगवान शिवांची पूजा करत आहेत असे चित्रित केले आहे. 

७. इथल्या गाभाऱ्यावरील छत सुंदर टेकडीरुपी असल्याने ह्या स्थळाला मणिकुडम असे नाव आहे.

मंदिराबद्दल माहिती:

हे पूर्वाभिमुख मंदिर असून ह्या मंदिराला पांच स्तरांचं राजगोपुर आहे आणि दोन परिक्रमा आहेत. येथील शिवलिंग स्वयंभू आहे. मंदिरात प्रवेश केल्यावर प्रवेशद्वाराजवळ वाहन मंडप आहे. पश्चिमेकडील परिक्रमेमध्ये श्री निवृत्ती गणपती, धनुष्यधारी श्री मुरुगन, श्री गजलक्ष्मी देवी, श्री दुर्गादेवी आणि श्री विष्णूदुर्गादेवी ह्यांची देवालये आहेत. उत्तरेकडे एक बिल्व वृक्ष आहे ज्याच्या खाली श्री नागराजांची मूर्ती आहे. पूर्वेकडे यागशाळा आणि नवग्रह सन्निधी आहे. 

मध्यावर असलेला मंडप जमिनीपासून ३० फूट उंचावर आहे. ह्या मंडपामध्ये जाण्यासाठी दक्षिणेकडून २४ पायऱ्या चढून जायला लागतं. ह्या मंडपाच्या प्रवेशाजवळ श्री विनायकर आणि श्री नटराजर ह्यांची देवालये आहेत. मंडपाच्या आतमध्ये श्री पशुपतीश्वरर, श्री मंगलांबिका आणि श्री पंकजवल्ली ह्यांची देवालये आहेत. श्री अंबिका देवींची दोन पूर्वाभिमुख देवालये आहेत. पंचभैरवांची देवालये पश्चिमाभिमुख आहेत आणि ती भगवान शिवांच्या देवालयाकडे मुख करून आहेत. 

इतर मूर्ती:

परिक्रमेमध्ये शिवलिंग, श्री सोमस्कंद, श्री मुक्तिकंदर, श्री शास्ता आणि श्री भद्रकाली देवी ह्यांच्या मूर्ती आहेत.

कोष्ट मूर्ती: श्री नर्तन विनायकर, श्री दक्षिणामूर्ती, श्री लिंगोद्भवर, श्री ब्रह्म, श्री विष्णूदुर्गादेवी आणि श्री चंडिकेश्वरर. 

पंचभैरव असे आहेत: श्री गुरुभैरवर, श्री चंडभैरवर, श्री काळभैरवर, श्री उन्मत्त भैरवर, श्री असितांग भैरवर

प्रार्थना:

१. हे पितृदोषांसाठी परिहार स्थळ आहे.
२. भाविक जन कृष्णाष्टमीला मृत्यूच्या भयापासून मुक्ती मिळविण्यासाठी तसेच तांत्रिक मंत्रांच्या प्रभावापासून मुक्ती मिळवण्यासाठी पंचभैरवांची पूजा करतात.
३. भाविक जन इथे कौटम्बिक नाती सुदृढ ठेवण्यासाठी प्रार्थना करतात.
४. भाविक जन इथे शिक्षणात प्रगतीप्राप्तीसाठी, वैभवप्राप्तीसाठी तसेच विवाहातील समस्यांचे निवारण करण्यासाठी इथे प्रार्थना करतात.

पूजा:

नियमित दैनंदिन पूजा, प्रदोष पूजा तसेच पौर्णिमा आणि अमावास्येला पूजा केल्या जातात.

मंदिरात साजरे होणारे सण:

अवनी (जून-जुलै): श्री गणेश चतुर्थी
पूरत्तासी (सप्टेंबर-ऑक्टोबर): नवरात्री
ऎप्पासी (ऑक्टोबर-नोव्हेंबर): अन्नाभिषेक, स्कंदषष्ठी
कार्थिगई (नोव्हेंबर-डिसेम्बर): कार्थिगई दीपम
मारगळी (डिसेम्बर-जानेवारी): थिरुवदुराई, अरुद्रदर्शन
थै (जानेवारी-फेब्रुवारी): पुष्य नक्षत्र उत्सव, संक्रांति
मासी (फेब्रुवारी-मार्च): शिवरात्रि

कार्थिगई महिन्याच्या प्रत्येक रविवारी श्री पशुपतीश्वरर ह्यांची मिरवणूक काढली जाते.

मंदिराच्या वेळा: सकाळी ६.३० ते ११.३०, दुपारी ४ ते रात्री ८.३०

पत्ता:  श्री पशुपतीश्वरर मंदिर, ऍट पोस्ट आवूर, तालुका: वेलन्गैमन, तामिळनाडू ६१२७०१

दूरध्वनी: ९१-९४८६३०३४८४

पुरोहिताचा दूरध्वनी: ९१-९४४८६६१५४८

अस्वीकरण आणि शिष्टाचार (Disclaimer and courtesy):

ह्या लेखांमधली माहिती संकलित करताना विविध आचार्यांचे उपन्यास, दक्षिण भारतातील काही नियतकालिके, तसेच इंटरनेट वरील विविध ब्लॉग्स आणि वेबसाईट्स ह्यांचा आधार घेतला आहे. आपल्याला ह्या लेखांमध्ये काही त्रुटी आढळल्यास आम्हाला जरूर कळवा.